අලි කරදරෙන් බේරෙන්න කසළ මධ්‍යස්ථානය වටා අගලක්

( 5.00 pm ) දශක ගණනාවක් තිස්සේ පවතින අලි – මිනිස් ගැටුම වැළැක්වීම සඳහා වනජීවී රාජ්‍ය අමාත්‍යාංශය මඟින් විශේෂ වැඩපිළිවෙළක් ආරම්භ කිරීමට සැලැසුම් කර තිබේ.

ඒ අනුව වන අලි බහුලව ගැවසෙන ප්‍රදේශවල අගල් කැපීම සහ එල්ලෙන අලි වැට ආරම්භ කිරීමට කටයුතු සැලැසුම් කර තිබේ.

ඒ අනුව අම්පාර නගරය ආසන්නව අම්පාර නගර සභාව මඟින් පවත්වාගෙන යන කසළ කළමනාකරණ මධ්‍යස්ථානය වටා අගලක් කැපීම වනජීවී සහ වන සංරක්ෂණ රාජ්‍ය අමාත්‍ය විමලවීර දිසානායක මහතා විසින් පසුගියදා ආරම්භ කරනු ලැබීය.

මේ කසළ මධ්‍යස්ථානයට දිනකට වන අලි තිහත් හතළිහත් අතර ප්‍රමාණයක් පැමිණෙන අතර කුණු කෑමට පුරුදුවීම හේතුවෙන් එම ස්ථානය අවට ඉදිකර ඇති අලි වැට දිනපතාම කඩා දමා කසළ ආහාරයට ගන්න බව ගම්වැසියෝ කියති.

පසුගිය වසර කිහිපය තුළ මේ කසළ ඒකකය වටා මිලියන ගණනක් මුදල් වැය කර කිහිප වතාවක් විදුලි වැට ඉදි කළ ද එය සති කිහිපයකට පමණක් සීමා විය. පොලිතින් සමඟ කුණු කෑම නිසා වන අලි කිහිපදෙනකුම මේ ස්ථානයේ මියගොස් සිටි බව වනජීවී නිලධාරීහු පවසා සිටිති. මේ අවස්ථාවට අම්පාර දිසාපති ඩී.එම්.එල්. බණ්ඩාරනායක, නැඟෙනහිර වනජීවී සහකාර අධ්‍යක්ෂ ජී. යූ. සාරංග සහ අම්පාර නගර සභාවේ සභාපති චමින්ද සුගත් යන මහත්වරු සහාභාගි වී සිටියහ.
dinamina.lk